ფილმი შედგება ნოველებისგან, რომლებიც ეხება ყველაზე მთავარ ადამიანურ ინსტინქტებს, ჭამას და სექსს. ყველა ნოველა დაფუძნებულია ნამდვილ ამბავზე, სრულიად ახალი კუთხით ასახავს თანამედროვე ქართულ ყოფით რეალობას და ძალიან ღრმა და ამავდროულად თბილი, თუმცა უკომპრომისო იუმორით ახასიათებს ქართული ოჯახებისა და შეყვარებული წყვილების ურთიერთობებს.

ლევანი და მაკა გადადიან საცხოვრებლად მაკას მშობლებთან რომელთაც ვერ წარმოუდგენიათ, რომ ახალგაზრდა წყვილს სიყვარული და მოფერება შესაძლოა სპონტანურად, დღე-ღამის ნებისმიერ დროს მოუნდეთ და რა მათი ბრალია, თუკი ოჯახს სადილად ლობიო აქვს, მწნილს კი აივანზე ინახავენ, სადაც ვერ აღმოჩნდები, თუ ლევანის და მაკას საძინებელი ოთახი არ გაიარე.